معلومات تهم كل شابه فى بدايه حياتها

[size=24] [center]أكيد أي بنت نفسها تحافظ على بشرتها على الأقل لمدة عشر سنين جايين
بحيث إن بشرتها تفضل شباب على طول
وطبعا ده مش هيتحقق إلا إذا البنت في الأول عرفت نوع بشرتها....

وبعد كده تعرف ازاي تعتني بيها يوميا في البيت بنفسها ...

وعلشان كده بقول لكل البنات خليكم معايا النهارده

وأنا هقولكم تعملوا إيه؟!



بصفة عامة السبب في ظهور معظم مشاكل البشرة زي مشكلة الحبوب والتجاعيد والبقع السودة بيرجع إلى مجموعة العوامل دي..

1. عدم شرب الميه بكميات كبيرة.

2. كثرة تناول الملح والسكر في الأكل.

3. عدم تنظيف البشرة كل يوم، والاستخدام الكثير للماكياج والنوم بيه علشان كده المفروض أي بنت تنظف بشرتها كل يوم من الماكياج ولو حصل ونامت بيه يبقى أول ما تصحى تغسل وشها بغسول زي صابون طبي وبعدين تمسح حوالين العين بقطنة فيها كريم مرطب.

4. النوم على مخدة مش نظيفة بيساعد على ظهور حبوب الشباب نتيجة لتراكم الجراثيم علشان كده بنصح أي بنت إنها تطلع الفرش كل يوم في الشمس.

5. كمان وضع إيدك على بشرتك بيساعد على ظهور الحبوب خاصة لو كانت إيدك مش نظيفة.

6. فيه نوع من الماكياج أو العطور بيسبب حساسية للبشرة وبيطلع حبوب علشان كده المفروض أي بنت تبعد عن الأنواع الرخيصة في أدوات الماكياج وتستخدم الأنواع الجيدة المعروفة.

7. التدخين من ضمن الأسباب اللي بتسبب ظهور التجاعيد مبكرا والحبوب.

8. التعرض المباشر لأشعة الشمس لفترات طويلة بيسبب ظهور البقع السوداء والحبوب.

وعلشان كده بنلاقي إن تنظيف البشرة يوميا شيء مهم وضروري جدا... وعلى فكرة كل بشرة ليها طريقة محددة في التنظيف والعناية بتختلف عن البشرة التانية وبصفة عامة تنقسم البشرة إلى الأنواع التالية...


أولا: البشرة العادية




لو كانت بشرتك عادية فأنت محظوظة أوي وده لأن البشرة العادية بنسبة 100% دي نعمة من عند ربنا ولازم تحافظي عليها...

إزاي تتعرفي عليها؟!

تقدري تعرفي إذا كانت بشرتك عادية أم لا من خلال مظهرها العام وده لأن البشرة العادية دايما بتكون ناعمة نقية مافيهاش أي شوائب أو حبوب أو جفاف ولا بقع في الجلد وكمان مافيهاش أي مسام دهنية ظاهرة...

إزاي تعتني بيها؟!
صباحا ومساءً

لازم البنت تهتم ببشرتها وتنظفها بنفسها كل يوم كويس وده لأن البشرة العادية بتميل للجفاف عند التقدم في السن، كمان ممكن يسبب الإهمال وعدم الاهتمام بالبشرة ظهور التجاعيد المبكرة عند سن 30 أو 40 سنة، وممكن يصيب البشرة بقع حوالين العين والفم والذقن بسبب عوامل الجو زي البرد والحر...علشان كده دايما بنصح البنت اللي بشرتها عادية إنها تهتم بيها وتنظفها يوميا لأن تنظيف البشرة له دور أساسي في مكافحة ظهور التجاعيد مبكرا، وكمان الكريمات المرطبة بتساعد على تأخر الشيخوخة...

ويا ريت كمان البنت ماتنساش تنظف رقبتها باستمرار لأنها أول حاجة بتظهر فيها الشيخوخة... وعلى فكرة أفضل حاجة للبشرة العادية إنك تنظفيها مرة في الصبح ومرة بالليل...




في الصباح.....

بتغسليها بغسول زي مثلا "مزيل الماكياج" بتجيبي قطعة قطن مبلولة مية وبعد ما تعصريها تحطيها في الغسول وبعدين تمرريها على وجهك، وممكن تستخدمي بخاخة أو رشاشة ترشي بيها وجهك وده بيكون زي غسول بينعش البشرة كل يوم.....بعد كده بتحطي كريم النهار المخصص للبشرة العادية ولازم يكون درجة حمايته من الشمس من ( SPF15:10 ) ويكون مكتوب على العلبة صلاحيته لكل أنواع البشرة.

في المساء....

بتعملي نفس الطريقة بس بتستخدمي "مزيل الماكياج الكريمي" شوية وممكن تستخدمي مزيل ماكياج ماركة "نيفيا" أو أي ماركة تانية أنت بتحبيها وبعد كده بتحطي كريمات مغذية للبشرة يكون فيها فيتامينات... ولو كنت قبل سن الثلاثين ممكن تحطي تحت العين "السيرم" بتاع التجاعيد 3مرات في اليوم، لكن لو كنت فوق الثلاثين يبقى ممكن تحطيه حوالين الرقبة وتدهنيه عى الوش كله كل يوم.



كمان لازم البنت اللي بشرتها عادية تعمل زيارة مرة كل شهر لأي مركز من مراكز التجميل المتخصصة علشان تعمل ماسكات حوالين العين والرقبة تكون مناسبة للبشرة العادية زي ماسك "الكولاجين" وماسك "الطين" وتعمل كمان تدليك للبشرة لأن ده بيساعد على زيادة عمر الجلد.



ثانيا: البشرة الدهنية



من أهم سمات البشرة الدهنية أن التجاعيد مش بتظهر فيها مبكرا ..

إزاي تتعرفي عليها؟!

هتقدري تتعرفي عليها من خلال مظهرها العام فلو بصيتي في المرايا هتلاقيها بتلمع، وممكن تلاقي فيها شوائب بعد 3أو4 دقايق من التنظيف... وكمان ممكن تلاقي دهون على الجبين والذقن والأنف "منطقة التيزون"، بالإضافة إلى أن المسام المفتوحة بتبقى في الأنف وكمان في الخد.... كمان البشرة الدهنية بتتميز بظهور حبوب على الخد والذقن والجبين بشكل مفاجئ...

وفيه اختبار ممكن أي بنت وهي قاعدة في البيت تعمله علشان تعرف إذا كانت بشرتها دهنية أم لا وهي إنها تجيب كلينكس "منديل ورق" وتحطه على بشرتها لمدة خمس دقائق لو لقت إن المنديل فيه زي بقع دهنية يبقى كده هي بشرتها دهنية.

مشاكل البشرة الدهنية.. كل مشكلة وليها حل!!



البنت اللي بشرتها دهنية بتعاني من مشاكل كتير أوي زي مثلا مشكلة البقع اللي بتظهر حوالين الخد والشفايف وأحيانا بتظهر حبوب على الظهر والكتف والخدود...كمان بتظهر مساحات جافة على الخدين بسبب نقص عامل الترطيب الطبيعي في البشرة ومشاكل تانية كتير زي مثلا...

مشكلة لمعان الماكياج

صاحبة البشرة الدهنية دايما بتعاني إن ماكياجها على طول بتظهر فيه لمعة بعد نص ساعة من وضع الماكياج وده بيحصل لأنها بتستخدم ماكياج فيه نسبة عالية من الدهون وبالتالي بيزود الدهون في البشرة ويخليها بتلمع أوي علشان كده ياريت البنت اللي بشرتها دهنية ماتحطش ماكياج كتير لأنه بيزود الدهون على البشرة أو تختار ماكياج خالي من الدهون.

مشكلة ظهور حب الشباب

ودي مشكلة بتعاني منها بنات كتير أوي وعلاجها بيكون عند دكتور جلدية متخصص علشان يشوف الحبوب دي ويحدد نوعها ويحدد العلاج المناسب وعلى فكرة حب الشباب بيظهر نتيجة حدوث التهاب في الغدد اللي تحت الجلد..

ظهور حبوب صغيرة بيضاء

أحيانا بتظهر حبوب صغيرة بيضاء ودي تقدر إنها تتخلص منها باستخدام الإبر الخاصة بالأنسولين ودي بتتعمل عند دكتور جلدية متخصص أو خبيرة تجميل وما تحاولش تلعب فيها نهائي.

إخفاء الحبوب

من ضمن المشاكل اللي بتعاني منها البنت اللي بشرتها دهنية هي مشكلة ظهور حباية أو اتنين بشكل مفاجئ في الوجه دي ممكن تداريها باستخدام "كريم أساس بسيط" أو "بان ستيك" من ماركة "كيولان" أو "برجوا" أو"نيفيا"... وممكن تستخدم الدرجة اللي بتفضلها على مكان الحباية فقط، ده في حالة لو كانت مستعجلة ورايحة مشوار وعايزة تداري الحباية..

المسام المفتوحة

بالنسبة لمشكلة المسام المفتوحة فدي علاجها إنها تغسل وشها بالميه الساقعة جدا وتبعد نهائي عن الميه السخنة....

وممكن كمان تمسح وشها بقطعة ثلج موضوعة في ورق كلينكس وتمررها على وشها وعلى فكرة الحركة دي بتقفل المسام خاصة في منطقة الذقن والأنف...كمان ممكن تفرك وشها بقطنة فيها "تونيك" وده لأن "التونيك" بيساعد على قفل المسام...

وده كمان ماسك قابض ممكن تعمله وهو عبارة عن (ملعقتين نشا + ملعقة مية ورد ساقعة) تخلطهم مع بعض وتحطهم على بشرتها لمدة 10 دقايق وبعدين تشطف وشها بالميه الساقعة. وده بيساعد على قفل المسام المفتوحة..

إزاي تعتني بيها في البيت؟!
صباحا ومساءً



أحسن طريقة للعناية بالبشرة الدهنية...

في الصباح....

غسيل البشرة بالميه والصابون وده لأن مفيش أحسن من الميه والصابون للبشرة الدهنية وعلى فكرة الصابون بيقوم بمثابة علاج للبشرة الدهنية لأنه بيخلصها من الدهون وبيخلي ملمسها عادي... وغير مستحب للبشرة الدهنية استخدام كريم الصباح خاصة لو كانت البشرة دي فيها حبوب ويا ريت البنت في الوقت ده تحط بدل منه الغسول أو تكتفي بالميه والصابون, ولو ماكانش فيه حبوب ممكن تستخدم الكريمات الخالية من الدهون....

في المساء...

برضه أحسن حاجة هي غسيل البشرة بالصابون والميه ولو كانت البنت صاحبة البشرة الدهنية بتعاني من وجود حبوب يبقى من الأفضل عدم وضع كريم بالليل علشان الكريم بيساعد على زيادة الحبوب وتستعيض عن الكريم ده بالأدوية المطهرة اللي بيقول عليها الدكتور أو الصيدلي لتطهير الحبوب والدهون.

وبصفة عامة البنت اللي بشرتها دهينة لازم تهتم كويس أوي بتنظيف الفرش والبدارات والإسفنجات الخاصة بالماكياج يوميا أو يوم بعد يوم بالميه والصابون وتسيبها تنشف لغاية تاني يوم.. وده علشان تحمي نفسها من ظهور الحبوب المفأجاة لأن فيه أوقات كتير أوي بيكون سبب ظهور الحبوب دي هو تلوث أدوات الماكياج....



ثالثا: البشرة الجافة



تتميز البشرة الجافة بأنها رقيقة وغير لامعة وعندها مسام رفيعة أوي وكمان بتبقى خشنة في منطقة الخدين والكفين والقدم وبتتأثر بدرجة الحرارة المرتفعة...

إزاي تتعرفي عليها؟!

تقدري تتعرفي على بشرتك بأنك تحطي إيدك تحت خدك هتحسي إن بشرتك ناشفة شوية ومافيهاش أي تدرجات ومش مرنة وكمان ماسكة نفسها...كمان البشرة الجافة بتبقى خشنة في ملمسها أول ما تغسليها بالمية والصابون وعلى فكرة البشرة الجافة ممكن تبقى شديدة الجفاف لو كنت بتحطي كريم باستمرار كل يوم وفجأة توقفتي لمدة أسبوع..

كمان البشرة الجافة ممكن يظهر فيها الاحمرار والبقع بعد تنظيفها بقوة أو نتيجة استخدام ماسك قوي وممكن تظهر فيها خطوط تجاعيد بسيطة عند العين أو خطوط حمراء رفيعة ومن عيوب البشرة دي إنها بتظهر فيها التجاعيد مبكرا بعد سن الثلاثين...

إزاي تعتني بيها في البيت؟!
صباحا ومساءً



ياريت البنت اللي بشرتها جافة تخلي الاهتمام بيها جزء من حياتها اليومية وتنظفيها الصبح وبالليل علشان تتجنب أي مشكلة ممكن تتعرض لها بشرتها وتحافظ عليها من ظهور التجاعيد مبكرا..

في الصباح...

المفروض البنت اللي بشرتها جافة ما تستخدمش المية والصابون كتير في غسيل وشها، وياريت تنظفها بكريم مرطب مثل "نيفيا" عن طريق استخدام قطنة تحط فيها الكريم وبعدين تعمل عملية تدليك خفيفة بالقطنة والكريم لمنطقة الذقن والقورة والخد...وبعد كده تجيب فوطة وتحطها تحت المية السخنة وبعد كده تحطها على بشرتها علشان تنظف بشرتها وتمسح بيها الكريم من على الوجه.



وعلى فكرة المفروض البنت اللي بشرتها جافة تحط كريم مرطب قبل ما تحط الماكياج خصوصا تحت العين وعلى الخدين أو ممكن ترش على وشها مية ساقعة جدا لأن ده بيساعد على إنعاش البشرة وبيثبت الماكياج وبيخليه شكله حلو أوي.

في المساء...

مهم جدا استخدام مزيل ماكياج لإزالة الماكياج خاصة ماكياج العين وممكن تستخدم بعده مناديل كلينكس عليها زيت لوز وتحطها على وشها وبعد كده تدلك وشها بأطراف أصابعها وبعد كده ممكن تستخدم قطنة محطوطة فيها ماء ورد ساقع وتدلك بيها بشرتها بحركات دائرية علشان الدورة الدموية تمشي في الجلد.

وفيه حاجة حلوة ممكن البنت تعملها وهي إنها تستخدم زيت اللوز كبديل لكريم العين وده عن طريق إنها تجيب زيت اللوز وتحط عليه نقطتين زيت زيتون وتعمل تدليك للمنطقة اللي حوالين العين بإديها من الداخل للخارج باتجاه عكس عقارب الساعة وده بيخلي عينيها تبان مرتاحة ونضرة تاني يوم الصبح.

وبصفة عامة بنصح البنت اللي بشرتها جافة إنها تشرب 3 أكواب من المية بعد ما تخرج من الحمام علشان تعوض الميه اللي بيفقدها جسمها بعد الحمام وتقلل على قد ما تقدر من شرب الشاي والقهوة ولو شربت أي حاجة من دي تشرب قصادها كوباية ميه، بالإضافة لذلك أنصحها إنها تنام نوم مستقر وهادئ على موسيقى هادئة لمدة 7 أو 8 ساعات على الأقل فقلة النوم والإرهاق تساعد على إظهار التجاعيد في البشرة وخصوصا الجافة...

كمان لازم البنت اللي بشرتها جافة تستخدم صابون طبي يناسب نوع بشرتها الجافة.




رابعا: البشرة المختلطة



أحيانا بيكون فيه نوع بشرة بتجمع بين إنها حساسة أو دهنية أو جافة وساعات ده كله بيبقى مع بعض علشان كده بنقول إن فيه بشرة مختلطة ودي تنقسم إلى "مختلطة جافة" و"مختلطة دهنية"..

إزاي تتعرفي عليها؟!

لو كنت عايزة تعرفي إذا كانت بشرتك مختلطة ولا لأ يبقى أول ما تصحي من النوم اغسلي وشك وبعدين استني ساعة وبعدين هاتي ورق كلينكس وحطيه على كل وشك لو لقيتي إن البشرة عند منطقة الخد لم تطبع أي دهون على المنديل وإن فيه دهون على المنديل مكان الأنف والذقن والجبهة يبقى بشرتك مختلطة دهنية... ولو حسيتي إن بشرتك ناشفة شوية أو محمرة زيادة عن اللزوم ومنطقة الأنف والذقن والجبهة هي اللي بتلمع تبقى بشرتك مختلطة جافة.